[Page 118]

THE AULD FARMER'S NEW-YEAR-MORNING SALUTATION TO HIS AULD MARE, MAGGIE, ON GIVING HER THE ACCUSTOMED RIPP OF CORN TO HANSEL IN THE NEW-YEAR.

1 A Guid New-year I wish you Maggie!
2 Hae, there's a ripp to thy auld baggie
3 Tho' thou's howe-backet, now, an' knaggie,
4 I've seen the day,
5 Thou could hae gaen like ony staggie
6 Out owre the lay.
7 Tho' now thou's dowie, stiff an' crazy,
8 An' thy auld hide as white's a daisie,
[Page 119]
9 I've seen thee dappl't, sleek an' glaizie,
10 A bonie gray:
11 He should been tight that daur't to raize thee,
12 Ance in a day.
13 Thou ance was i' the foremost rank,
14 A filly buirdly, steeve an' swank,
15 An' set weel down a shapely shank,
16 As e'er tread yird;
17 An' could hae flown out owre a stank,
18 Like onie bird.
19 It's now some nine-an'-twenty-year,
20 Sin' thou was my Guidfather's Meere;
21 He gied me thee, o' tocher clear,
22 An' fifty mark;
23 Tho' it was sma', 'twas weel-won gear,
24 An' thou was stark.
25 When first I gaed to woo my Jenny,
26 Ye then was trottan wi' your Minnie:
27 Tho' ye was trickie, slee an' funnie,
28 Ye ne'er was donsie;
[Page 120]
29 But hamely, tawie, quiet an' cannie,
30 An' unco sonsie.
31 That day, ye pranc'd wi' muckle pride,
32 When ye bure hame my bonie Bride:
33 An' sweet an' gracefu' she did ride
34 Wi' maiden air!
35 KYLE-STEWART I could bragged wide,
36 For sic a pair.
37 Tho' now ye dow but hoyte and hoble,
38 An' wintle like a saumont-coble,
39 That day, ye was a jinker noble,
40 For heels an' win'!
41 An' ran them till they a' did wauble,
42 Far, far behin'!
43 When thou an' I were young an' skeigh,
44 An' Stable-meals at Fairs were driegh,
45 How thou wad prance, an' snore, an' scriegh,
46 An' tak the road!
47 Towns-bodies ran, an' stood abiegh,
48 An' ca't thee mad,
[Page 121]
49 When thou was corn't, an' I was mellow,
50 We took the road ay like a Swallow:
51 At Brooses thou had ne'er a fellow,
52 For pith an' speed;
53 But ev'ry tail thou pay't them hollow,
54 Whare'er thou gaed.
55 The sma', droot-rumpl't, hunter cattle,
56 Might aiblins waur't thee for a brattle;
57 But sax Scotch mile, thou try't their mettle,
58 An' gart them whaizle:
59 Nae whip nor spur, but just a wattle
60 O' saugh or hazle.
61 Thou was a noble Fittie-lan',
62 As e'er in tug or tow was drawn!
63 Aft thee an' I, in aught hours gaun,
64 On guid March-weather,
65 Hae turn'd sax rood beside our han',
66 For days thegither.
67 Thou never braing't, an' fetch't, an' flisket,
68 But thy auld tail thou wad hae whisket,
[Page 122]
69 An' spread abreed thy weel-fill'd brisket,
70 Wi' pith an pow'r,
71 Till sprittie knowes wad rair't an' risket,
72 An slypet owre.
73 When frosts lay ling, an' snaws were deep,
74 An' threaten'd labor back to keep,
75 I gied thy cog a wee-bit heap
76 Aboon the timmer;
77 I ken'd my Maggie wad na sleep
78 For that, or Simmer.
79 In cart or car thou never reestet;
80 The steyest brae thou wad hae fac't it;
81 Thou never lap, an' sten't, an' breastet,
82 Then stood to blaw;
83 But just thy step a wee thing hastet,
84 Thou snoov't awa.
85 My Pleugh is now thy bairn-time a';
86 Four gallant brutes, as e'er did draw;
87 Forby sax mae, I've sell't awa,
88 That thou hast nurst:
[Page 123]
89 They drew me thretteen pund an' twa,
90 The vera warst.
91 Monie a fair daurk we twa hae wrought,
92 An' wi' the weary warl' fought!
93 An' monie an' anxious day, I thought
94 We wad be beat!
95 Yet here to crazy Age we're brought,
96 Wi' something yet.
97 An' think na, my auld, trusty Servan',
98 That now perhaps thou's less deservin,
99 An' thy auld days may end in starvin',
100 For my last fow,
101 A heapet Stimpart, I'll reserve ane
102 Laid by for you.
103 We've worn to crazy years thegither;
104 We'll toyte about wi' ane anither;
105 Wi' tentie care I'll slit thy tether,
106 To some hain'd rig,
107 Whare ye may nobly rax your leather,
108 Wi' sma' fatigue.

    Text

    • TEI/XML [chunk] (XML - 194K / ZIP - 19K) / ECPA schema (RNC - 357K / ZIP - 73K)
    • Plain text [excluding paratexts] (TXT - 3.6K / ZIP - 2.0K)

    Facsimile (Source Edition)

    (Page images digitized by National Library of Scotland.)

    Images

    All Images (ZIP - 10M)

    PDF

    All Images (PDF - 3.0M)

    About this text

    Title (in Source Edition): THE AULD FARMER'S NEW-YEAR-MORNING SALUTATION TO HIS AULD MARE, MAGGIE, ON GIVING HER THE ACCUSTOMED RIPP OF CORN TO HANSEL IN THE NEW-YEAR.
    Author: Robert Burns
    Themes:
    Genres: narrative verse

    Text view / Document view

    Source edition

    POEMS, CHIEFLY IN THE SCOTTISH DIALECT, BY ROBERT BURNS. Kilmarnock: printed by John Wilson, M,DCC,LXXXVI., 1786, pp. 118-123. 240p.; 8⁰. (ESTC T91548) (Page images digitized by National Library of Scotland.)

    Editorial principles

    The text has been typographically modernized, but without any silent modernization of spelling, capitalization, or punctuation. The source of the text is given and all editorial interventions have been recorded in textual notes. Based on the electronic text originally produced by the ECCO-TCP project, this ECPA text has been edited to conform to the recommendations found in Level 5 of the Best Practices for TEI in Libraries version 3.0.

    Other works by Robert Burns